C朗加盟沙特阿拉伯球隊艾納斯之後，好快就有機會同宿敵美斯交手，因為呢位阿根廷球王效力嘅巴黎聖日耳門（PSG）將於2023年1月19日到訪沙特，同「利雅得明星隊」踢熱身賽，相信C朗將會代表明星隊上陣，再次同美斯合演球王大戰。

為「利雅得明星隊」上陣

由卡塔爾體育投資局擁有嘅PSG早前已經宣布將於1月去卡塔爾集訓，並於1月19日喺沙特阿拉伯首都利雅得踢1場熱身賽，對手係由艾納斯及希拉爾球員組成嘅「利雅得明星隊」，C朗身為艾納斯新招牌球星，相信會成為明星隊一員。

剛過去嘅世盃，好多球迷原本期望美斯同C朗可以喺決賽交鋒，決出終極球王，但事與願違，葡萄牙8強就出局，C朗同美斯緣慳一面，估唔到咁快又有機會碰頭，加埋「新球王」基利安麥巴比勢必成為全球矚目焦點。