世界盃2022︱足球快訊︱暴富娛樂︱世界盃到啦喂！唔識波又唔想塔錯線既快D睇啦！

世界盃就殺到
給「忽然球迷」嘅安全指引

鑑於世界盃臨近，唔少朋友喺公司、學校少不免要做下「忽然球迷」，女朋友同老婆又想搭下咀，避免出現馬騮遮眼式尷尬場面，為各位打造快樂而輕鬆嘅社交生活，特出此安全指引，俾大家參考參考。

1）11月先踢世界盃係真，唔係你嘅另一半作個大話呃你出去玩。

2）雖然今年世界盃同上年歐國盃係同一間電視台播，不過今年嗰間電視台旗下嘅男團冇為世界盃出新歌，亦冇出海報同口罩等嘅產品，對前夫們好似係好消息。

3）雖然已經2022年，但唔排除仲會有人問：「碧咸呢？」人係會老，布魯克林都23歲喇，今年仲結埋婚。

4）世界盃係唔會有曼聯、皇馬、巴塞、拜仁、傑志、洛杉磯湖人，同金洲勇士。若果你分唔清球會同國家隊，簡單嚟講，球會係班，國家隊係社，2E班同4C班係唔會出現喺社際比賽。

5）今屆大熱門係巴西、法國，同阿根廷，所以最穩陣就係話睇好美斯威返次。當然同樣論調用喺C朗身上都得，不過你要保證人哋問起你點睇佢近排單嘢時要答得出囉。

6）如果要表現深度，今屆不妨話自己捧加拿大，但首先要知道有咩球員。另一個簡單啲方法，就係當有人話自己捧英格蘭，你先發制人笑咗佢先。

7）但如果要真正表現深度，咁就應該直接講自己唔會睇今屆世界盃。「你哋知道嘛？呢屆世界盃係血汗世界盃，啲外勞有汗冇糧出，好多仲慘死，嗰國家又對性小眾唔友善……」

8）靚仔方面，其實近幾年球壇的確係有啲青黃不接，數嚟數去都仲係C朗、基奧特，同戴巴拿呢啲，呢方面真係要期待新人。

9）我唔會教你咩係越位，因為依家越位個標準已經唔喺球例到，係喺一個你見佢唔到，但佢有好大權嘅人到。

10）我唔清楚世界盃負責播國歌嘅係咪實習生，但杯葛世界盃方面，我哋香港係做到嘅，仲有中國陪我哋一齊杯葛，夠晒義氣。